தேசிய மருத்துவர்கள் தினம். 1.7.2024.
நோய் நாடி நோய் முதல் நாடி தணிக்கும்
வாய்நாடி வாய்ப்பத் தணித்திடுவர்
தாய்போல் அக்கறையுடன் நம்மை
சேய்போல் அன்புடன் கவனிப்பர்.
மெய்வருத்தம் பாராது நமது
மெய்யதனை நன்கு பராமரிப்பர்.
கையறு நிலையில் வந்தாலும் ,நம்பிக்-
-கை கொடுத்துக் காப்பாற்றிடுவர்.
படைத்தது நம்மை இறையென்றால்
காப்பது மருத்துவத் துறையன்றோ.
மருத்துவம் என்பது தொழிலானாலும்
தனித்துவம் நிறைந்த சேவையுமாம்.
மகத்துவம் உணர்ந்து பணிபுரிகின்ற
மருத்துவர் தம்மை மதித்திடுவோம்
தன்னலம் கருதாது எந்நேரமும் அவர்கள்
நம் நலம் காக்க உழைத்திடுவார் -அந்த
பொதுநலம் கருதும் புனிதர்களின்
பொற்பாதம் பணிந்து வணங்கிடுவோம்.
சிலேடை சித்தர் சேது சுப்பிரமணியம்
