காரைக்குடி பாத்திமாஹமீத், ஷார்ஜா
வானத்தை வில்லாக
வளைப்பது சாதனையல்ல,
வறியவர்களின் ஏழ்மையைக்
களைவதே சாதனை !
தண்ணீர்த் தொட்டிகள்
அமைப்பது சாதனையல்ல,
ஏழைகளின் கண்ணீரைத்
துடைப்பதே சாதனை !
இலவச உணவு எப்போதும்
வழங்குவது சாதனையல்ல,
இல்லாதாரின் கனவுகளை
நனவாக்குவதே சாதனை !
கொடிகட்டிப் பறப்பது
என்றென்றும் சாதனையல்ல,
ஏழையொருவனுக்கு எழுத்தறிவித்தலே
உயர்ந்த சாதனை !
பெண்மையை அடக்கி
ஆள்வது சாதனையல்ல,
நன்மதிப்புக் கொடுத்து
மேன்மை காண்பதே சாதனை !
ஆகாயத்தில் உயரப்
பறப்பது சாதனையல்ல,
அன்னையின் மனதில்
உயர்ந்த இடத்தில்
இருப்பதே சாதனை !
அனாதை விடுதிகளுக்கு
அன்னதானம் வழங்கி
வருவது சாதனையல்ல,
பேணிவளர்த்த நம்பெற்றோரை
முதியோர் இல்லம் அனுப்பாமல்
இருப்பதே நம்பெரும் சாதனை !!