காரைக்குடி பாத்திமா ஹமீது
ஷார்ஜா
கண்ணீரைப் பெரிதாக நீ நினைத்திருந்தால்
கள்ளிப்பால் இல்லாமல் என் கதை முடிந்திருக்கும் !
வேதனைகளைப் பெரிதாக நீ எண்ணியிருந்தால்
நெல்மணிகள் இல்லாமல் நான் நீர்த்துப் போயிருப்பேன் !
பெண்தானே என்று நீ கருதியிருந்தால்
மண்ணோடு மண்ணாக நான் மடிந்து போயிருப்பேன் !
சோதனைகள் பல கடந்து
சுகமாக என்னைப் பெற்றெடுத்தவளே,
சிறப்பாக இம்மை மறுமை கல்வி கொடுத்து
சீராக என்னை வளர்த்தெடுத்தவளே,
படைத்தவனைக் காண எண்ணும்போதெல்லாம்
உன்முகம்தான் எனக்குக் காட்சியாகின !
சொர்க்கம் என்பது நின்காலடியில்
மட்டும்தான் தாயே வேறொன்றும் வேண்டாம் !
ஆண்டாண்டு காலங்கள்
ஆனாலும் அன்னையே
உன்னை நான் மறவேன் !
மாதங்கள் பல நூறு கடந்தாலும் மாதாவே
உன்னை நான் மறவேன் !
வார்த்தைகள் கிடைக்கவில்லை
வளர்த்தவிதம் எழுதுவதற்கு
கவிதைகள் பல நான் எழுதினாலும்
உன் காலடிகளுக்கே சமர்ப்பணம் !
என்றென்றும் அன்புடன்…