திருமலர் மீரான்
அனைத்துலக அதிபதியின்
அழைப்பினை ஏற்று
சாந்தி மார்க்கச் சோலையின்
சமாதானப் புறாக்கள்
நேசமுடன் நடத்தும்
நெடிய யாத்திரையே
ஹஜ் என்னும்
புனிதப் பயணம் !
மனிதப் பிரதிநிதிகள் வழி
மா ஞாலமே துல்ஹஜ்ஜில்
மக்கா மதீனா நோக்கி
இடம் பெயர்கின்றது !
அரபி மாக்கடலில்
அகில நாடுகளின்
மனித ஆறுகள்
தடையேதுமின்றி
கண்ணியத்துடன்
கைகோத்து
புண்ணியம் பெறுகின்றன !
ஆலயம் கஅபாவில்
அநேக நாடுகளின்
கொள்ளை அழகு
வெள்ளை தேவதைகள்
பறந்து வந்து
கூடியிருக்கின்றன !
பல்வேறு இடங்களிலிருந்து
பறந்து வந்த பல லட்சம்
பலப்பல பறவைகளை
அன்போடு அரவணைத்து
அரபாத் சரணாலயம்
அருள் உணர்வும் உணவும்
ஆக்கமுடன் அளிக்கின்றது !
வெள்ளைத் துணிக்குள்
பச்சை மனிதமா
மரகதங்கள் உமிழும்
சன்மார்க்க ஒளிகண்டு
சந்திரனே வெட்கிக்கும் !
இறைவனை மிக நெருங்கி
இறைவனையே
காதலிப்பவர்கள் குலாவும்
குவலயக் குலப் பெருவிழா !
பேரிறைவன் சந்நிதியில்
பாவங்களை பலியிட்டு
மன்றாட்டம் தேடும் தவ்பா
மகா யக்ஞம் !
இபுறாகீம் நபியின்
தியாக சாலையில்
திசை எட்டிய
நேசர்கள் நடத்தும்
ஞான யோகப் பெரும் வேள்வி !
நன்றி :
சமரசம்
16 – 30 நவம்பர் 2009