அருள்வேதம் அல்குர்ஆன்
திருவை அப்துர் ரஹ்மான்
ஹளரத் ஈஸா (அலை) அவர்கள்
காலம் நடந்தது கருவும் வளர்ந்தது
கோலம் மாறிடும் குமரியாம் மர்யம்
நிலையைக் கண்டே நகைத்தனர் மாந்தர்
அலையும் அவரோ அந்நகர் துறந்தார் !
பேசும் பொற்கிளி பவளச் செவ்வாய்
ஈசா நபியும் எழிலாய்ப் பிறந்தார்
வருந்தும் தாயை வனப்புடன் நோக்கி
பொருந்தும் மொழியாய்ப் புன்னகை சிந்தித்
தேறுதல் கூறும் செல்லப்பிள்ளை !
ஆறுதல் கொண்டார் அன்னை மர்யம் !
வாலிபம் வந்தது வளர்ந்தது ஞானம்
சீலம் செறிந்திடச் சேர்ந்தது மோனம்
மந்தை மாந்தரின் மடமை நீக்கிச்
சிந்தை சிறந்திடச் சித்தங் கொண்டார் !
அல்லாஹ் அவரை அன்புடன் தூதராய்
சொல்லால் செயலால் சிறக்கச் செய்தான்
இறைவன் ஒருவனே இணை துணை யில்லான்
நிறைவாம் போதனை நிதமும் செய்தார் !
இன்ஜீல் வேதம் ஏற்றிடும் தூதர்
தன்னருஞ் சேவையால் தழைத்தே உயர்ந்தார் !
இல்லா தொன்றால் எதையும் ஆக்கிடும்
வல்லான் இறைவன் வகுத்ததே சட்டம்
அவனின் ஆற்றலை அரும்பெரும் சக்தியை
புவியின் மாந்தர் புரியவே காட்டினான் !
நன்றி :
குர்ஆனின் குரல் ஜுன் 2013