கீழக்கரை வள்ளல் மாமணி
அல்ஹாஜ் பி.எஸ்.ஏ. ரஹ்மான் – அல்ஹாஜ்ஜா முத்து சுலைஹா
ஆகியோரின் பேத்தி
ஜனாப் பி.எஸ்.ஏ. ஆரிப் புஹாரி – நிலோஃபர்
தம்பதிகளின் குலம் தழைக்க வந்த கோமேதகம்
வள்ளல் வழிச் செல்வி ஆயிஷாவுக்கு
தாலாட்டு
இராகம் : நீலாம்பரி
‘குன்’னென்ற சொல்லின் குறிப்பால் கொடையளக்கும்
பென்னம் பெரியோனின் பேரருளால் வந்துதித்த
அன்புக்(கு)கரசி ஆயிஷா தாலேலோ !
அன்னை நிலோஃபரின் ஆருயிரே தாலேலோ !
வண்டலூர் பிறைப்பள்ளி
வரலாற்றில் புகழ் அள்ளிக்
கொண்டுவரும் அந்தக்
கொள்கைப் பாசறைதான்
தந்து (உ) வந்த தங்கமுன்
தந்தை (ஆரிப் புஹாரி
சிந்தையெலாம் இனிக்கின்ற
செங்கரும்பே தாலேலோ !
தென்காயல் முத்தொளியே !
தேனொழுகும் மாங்கனியே !
மண்காயப் பொறுக்காத
மனம்காயாப் பொன்மழையே !
அண்ணல்நபி அவதரித்த
அழகொளிரும் சீமையிலே
உன்வருகை பூத்ததம்மா !
ஓவியமே ! தாலேலோ !
உன் … முன்னோர் ஆலிம்கள் !
மூதறிஞர் ஞானிகளாம் !
பன்னுமா நன்மறையின்
பாதை விளக்குகளாம் !
நண்ணும் மெய்ஞ்ஞான
நாதாக்கள் வழிவந்த
இன்பப் பெருக்கே !
ஏழிசையே ! தாலேலோ !
பூதூவி யன்பாய்
புவனம் வரவேற்ற
மாமேதை ஷெய்கு
மாப்பிள்ளை லெப்பை ஆலிம்
சீலப் பரம்பரையில்
செழித்துவந்த ரோஜாவே !
நூலே ! நுண்ணறிவே
நூலகமே ! தாலேலோ !
கார்தட்டும் பஞ்ச
காலத்தும் சளைக்காமல்
மார்தட்டி ஈந்த
மால் சீதக்காதியவர்
பேர்வற்றிப் போகாமல்
பேரறம் காத்துவரும்
சீரார் கொடைமரபுச்
சித்திரமே தாலேலோ !
வானம் கைவிட்ட
வறண்ட காலத்திலும்
ஞானப்பூ குலுங்கும்
நந்தவனம் உண்டாக
ஆனவரை உன் நன்னா
அல்ஹாஜ் பி.எஸ்.ஏ
தானப் பாலூட்டுகிறார்
சந்தனமே அறிவாயோ !
பெண்ணினத்தின் சூஃபிகளும்
பெரும் ஞானப் பண்டிதரும்
தன்னகத்தே கொண்டு (உ) வக்கும்
சங்கையொளிர் கீழக்கரை !
பொன்தீனின் வாழ்வுக்குப்
புதுப்பாதை போடவந்த
தென்றல் நீ ! ஆயிஷா !
தேன் தமிழாய் வாழியவே !
அருள்ஞானப் பயிர்விளைக்கும்
‘அருஸியா தைக்கா’ வின்
நிறைஞானச் செல்வர்களாம்
நின்னுடைய முன்னோர்கள் !
மறையமுது பாற்சுவையே !
மாசில்லா மணிவிளக்கே !
நிறையெழில் தீன்போல
நீடூழி வாழியவே !
கவிஞர் மு. சண்முகம் ( தற்போது கவிஞர் மு ஹிதாயத்துல்லா )
டாக்டர் சாகிர் உசேன் கல்லூரி
இளையான்குடி
நன்றி :
தீன் தமிழ் மாத இதழ்
பிப்ரவரி 1987