என்றும் வாழ்வார் !
-பால் நிலவன்
( காஞ்சி அப்துல் ரவூப் பாகவி )
1.அதிர்ந்தென்றும் பேசாத தென்றல் பேச்சு !
அடக்கத்தின் உருவம் ! நற் பண்பே மூச்சு !
பதிக்கின்ற பார்வையிலே மிளிரும் ஞானம் !
பார்ப்பவரைத் துல்லியமாய் அளக்கும் ஆழம் !
முதியவர்கள் தமைக் கண்டால் முகம் மலர்ந்து
முகமனுடன் மரியாதை செய்யும் சீலம் !
புதியவர்களைக் கூட புன்ன கையால்
பொலிவாக்கும் நற்பெருமான் சலாஹு த்தீனார் !
2. பொற்குவியல் பல கோடி பெற்றி ருந்தும்
பொறுமையுடன் பணிவு கொளும் பெருமனத்தார் !
தற்பெருமை கொள்ளாமல் தணிவு காட்டித்
தளும்பாத நிறைகுடத்துத் தன்மை கொண்டார் !
கொற்றவனின் மேல் பூண்ட அன்பால் பிறரின்
குறைமறந்து மன்னித்தே அரவணைப்பார் !
மற்றெதிலும் அவர் பற்று கொண்டாரில்லை !
மாபெரியோன் பண்பதனைப் பற்றிக் கொண்டார் !
3. சாதிமதம் பாராமல் அனைவ ருக்கும்
சரிசமமாய் நன்மை செயும் மனித நேயர் !
மூதறிஞர் தமைக் கண்டால் முனைந்து சென்று
முறையுடனே பெருமை செயும் தகைமையாளர் !
காதும் காதும் வைத்தாற் போலே ஏழ்மைக்
கனலுக்குள் வீழ்ந்தவரைக் கைகொடுத்து
ஆதரிக்கும் நல்லிதயத் தூய்மை கொண்டார்,
அறவாழ்வை நேசிக்கும் சலாஹு த்தீனார் !
4. உதவியென வந்தோர் மனம் குளிர்ந்து வாழ்த்த
உள்ளபடி முடிந்தவரை உதவி செய்வார் !
பதவியினால் கர்வமவர் கொண்டாரில்லை
பணிவுதனை அணிகலனாய் ஆக்கிக் கொண்டார் !
வதனமெலாம் நல்லுணர்வாய் வடிவம் கொண்டே
வையத்தார் அனைவர்க்கும் நலமே நாடும்
மதுரகுண சான்றோராம் சலாஹு த்தீனார்,
வல்லவனின் நல்லருளால் என்றும் வாழ்வார் !
( துபை ஈடிஏ அஸ்கான் ஸ்டார் குழுமத்தின் மேலாண்மை இயக்குநர் அல்ஹாஜ் சையத் எம் ஸலாஹுத்தீன் அவர்களை வாழ்த்தி எழுதப்பட்ட கவிதை )