முதுவைக் கவிஞர் உமர் ஜஹ்பர்
கர்பலா என்னும் பகுதியிலே – ஒரு
கடிமன சரிதை நடந்ததுவே !
உருகிடும் மனமும் உதிரமுமே – அதில்
உறைந்திடும் சிந்தையும் செயல்களுமே !
ஜனநா யகத்தின் ஒளியேற்ற – நாட்டு
ஜனங்களின் உரிமையை நிலைநாட்ட
தனதுயிர் சிறிதெனக் களமேற்று – ஹுஸைன்
துள்ளியே எழுந்ததும் மறந்திடுமா?
கொடுமனம் கொண்ட எஜீதவரும் – நற்
குணமிகக் கொண்ட ஹுஸைனவரை
அடிமைக்கும் அடிமையாய் நடத்தியதை – இந்த
அகிலத்தின் நெஞ்சம் மறந்திடுமா ?
தாகித்த ஹுஸைனார் நீரருந்த – புராத்
தண்ணீர் தரவும் மறுத்தவரை –
மோதூத்த அரசியல் வீணர்களை – இன்றும்
முஃமின்கள் மனமும் மறந்திடுமா ?
பெருமான் நபிகள் பேரர் ஹுஸைன் – கர்பலா
போரில் மாண்டது மறந்திடுமா ?
அருமை ஹுஸைனார் ஜனநாயக – உணர்வை
அகிலம் என்றும் மறந்திடுமா ?