( முதுவை கவிஞர், ஹாஜி, உமர் ஜஹ்பர் )
முப்பத்து நாள் தொடர்ந்து முழுதாக நோன்பிருந்து
முறையான பயிற்சியினால் முப்பசியைத் தானறிந்து
அப்பழுக்கு இல்லாத மனிதரெனப் புனிதரென
ஆகிவிட்ட முஃமின்களே ! முஸ்லிம்களே ! உங்களுக்கு
இப்பொழுது இன்பத்தின் எல்லையென மலர்ந்திருக்கும்
ஈதுப்பெருநாள் பிறந்திருக்கும் ! சொர்க்கமது திறந்திருக்கும் !
செப்பியதோர் ரஹ்மத்தும் மஃபிரத்தும் சேர்ந்திருக்கும் !
சங்கைமிகு ஸலாமத்தும் பரக்கத்தும் குவிந்திருக்கும் !
”ரய்யானின் சொர்க்கபதி அலங்கரித்துக் காத்திருக்கும் !
“ராஹத்தாய் கஸ்தூரி வாசமங்கு கமழ்ந்திருக்கும் !
மெய்யான “ஹூர்” என்னும் சுவனமங்கை சிரித்து நிற்கும் !
மேலான இறையோனின் ‘ரிலா’ பொருத்தம் சிறந்திருக்கும் !
துய்ய மலக் “ரில்வானும்” விழி மலர்ந்து வரவேற்கும் !
தூதர் ஹபீப் “ஷபா அத்தும்” தடையின்றித் தொடர்ந்திருக்கும்
தெய்வீக மார்க்கத்தின் திருக்கடமை நிறைவேற்றித்
திகழ்கின்ற “முத்தக்கீன்” தீனவரே ! வாழ்த்துகிறேன் !
பகலெல்லாம் பசித்திருந்த உத்தமரே வாழ்த்துகிறேன் !
பண்பாடித் தராவீஹைத் தொழுதவரே வாழ்த்துகிறேன் !
முகமலர தர்மங்கள் ஈந்தவரே வாழ்த்துகிறேன் !
முழுதாக குர்ஆனை முடித்தவரே வாழ்த்துகிறேன் !
இகபரமும் இறையருளைப் பெற்றவரே வாழ்த்துகிறேன் !
இருகரமும் ஏந்தி நின்று “துஆ” செய்து வாழ்த்துகிறேன் !
அகங்குளிர அருள்கோடி வென்றவரே வாழ்த்துகிறேன் !
ஆண்டுபல ரமளானைப் பெற்றிடவே வாழ்த்துகிறேன் !