( ‘தமிழ்மாமணி கவிஞர் மு. ஹிதாயத்துல்லாஹ், இளையான்குடி. )
ஒன்றுயிறை அல்லாது
வேறில்லை என்பதையே
மன்றத்தில் பதிவு செய்த
மாமணியே ! நாயகமே !
அன்றிருந்த சிலை வணக்கம்
ஆகாதெனச் சொல்லி
எந்தவொரு சக்தியும்
அதற்கில்லையென உரைத்து
சிந்திக்க வைத்த
சித்திரமே ! நாயகமே ! – எம்
கண்களைத் திறந்து வைத்த
கண்மணியே ! நாயகமே !
ஆங்காங்கே கூட்டங்களாய்
அலைந்து திரிந்தோர்க்குப்
பாங்காகத் தீனைப்
பக்குவமாய் எத்திவைத்து
காண்போர் வியக்கும்
கைருல் உம்மத்தாய்
மாண்பாய் இணைத்த
மகத்துவத்தை என்னென்போம் !
படைத்த ரப்பின்
பரிசளிப்பாய் எங்களுக்கு
கிடைத்த பெரும் பேறே !
கீர்த்தியுள்ள நாயகமே !
ஒரு மாதிரியின்றி
உலகம் தவிக்கையிலே
ஒரு ’மாதிரி’ யாய் வந்த
உத்தமரே ! நாயகமே !
உங்களை அழகிய
முன்மாதிரி யென்போம் !
முதல் மாதிரி யென்போம் !
நன்மாதிரி யென்போம் ! – எங்கள்
நலம் நாடும் நாயகமே !
உம்மி நபியானாலும்
உலகம் படிக்கின்ற
செம்மைசேர் அறிவுச்
சீர்சோலை நாயகமே !
அசத்தியம் அழிந்திடவே
நீங்கள் எடுத்து வைத்த அடிகளிலே
சத்தியமாக நாங்கள்
‘நிதானம்’ பயின்றோமே !
தாயிப் நகரினிலே
தாஹா உங்கள் சோதனையில்
ஆஹா ! பொறுமை யென்னும்
அணிகலனைக் கண்டோமே !
மக்கா விட்டு மாமதீனா
ஹிஜ்ரத் சென்றீர்கள் !
ஹக்கான தீனுக்காம்
தியாகமென உணர்ந்தோமே !
மக்கத்து முஹாஜிர்களையும்
மதீனத்து அன்ஸாரிகளையும்
தக்கதோர் விதமாக
ஒன்றிணைத்த சாதனையில்
சங்கையான நல்ல
‘சகோதரத்துவம்’ படித்தோமே !
எங்கேயும் இதுபோல
நடந்ததாய் … அறியோமே !
பத்ருப் போரில் உங்களின்
‘சாணக்கியம்’ படித்தோமே !
எதிரிகளை மன்னித்த
ஏற்றம் கண்டு வியந்தோமே !
பசிதணிக்க கல் கட்டி
படுத்திருந்த உங்களைப்போல்
ஆட்சியாளர் யாரையும்
அறிந்ததில்லை நாயகமே !
ஈச்சமரக் கட்டில் தந்த
இனிய கொடைத் தழும்பெல்லாம்
ஆட்சியாளர் யார் பெற்றார் ?
அண்ணல் நபி நாயகமே !
வாழும் காலத்தே தீனின்
வளர்ச்சி கண்டு பூரித்த
மாநபியே ! யெங்கள்
மணிவிளக்கே ! நாயகமே !
ஏவல் விலக்கல்
எதுவென்று தெரியாத
நாட்டுப் புறமாயிருந்தோம்
நாகரீக உடை தந்தே – எங்கள்
தன்மானம் காத்தீர்கள் !
தங்கநபி நாயகமே ! – இங்கே
பெண் வாழ்வும் மலரப்
பெரிதாய் உழைத்தீர்கள் !
மற்ற நபிமார்கள்
மாண்புடையோர் ஆயினும் – நீங்கள்
பெற்ற பெரும்பேறு
பெரிதன்றோ … நாயகமே !
பாங்கில், தொழுகையில்
பரவசமாய் உங்கள் பெயரை
நாங்கள் உச்சரிக்க
நற்பேறு பெற்றோமே !
இம்மையில் மட்டுமல்ல; நாளை
மறுமையிலும் எங்கட்காய்
கண்ணிய ஷஃபாதத் வழங்கும்
கன்னலே ! நாயகமே !
உம்மத்தே முஹம்மதாய்
உலகில் பிறந்ததற்காய்
கோடி கோடியாய் நன்றியை
குவிப்போமே நாயகமே !