கே. ஏ. ஹிதாயத்துல்லா
பனைவெல்லம் பச்சரிசி பருப்பு
பானை யிலிட்டு பக்குவமாய் கலந்து
பாகாய் கரைந்து மணக்கும் பொங்கல்
பொங்குமே எங்கும் இன்பம் தங்குமே !
பட்ட துன்பம் அதைப் பழையதோடு
நெருப்பி லிட்டுப் பொசுக்கி விட்டுஇனி
தொட்ட தெல்லாம் துலங்க போகி
வந்ததே எங்கும் இன்பம் தங்குதே !
கன்னியர் வேல்விழிகள் காளையரை நோக்க
காளையரோ ஜல்லிக்கட்டு காளைகளைத் தாக்க
குருதிச் சேற்றில் குளித்தெழும் வீரம்
பொங்குமே எங்கும் இன்பம் தங்குமே !
நெற்றி வியர்வை நிலத்தின் உரமாக்கி
சேற்றை உழுது விதைத்து நெல்லாக்கி
பாருக்கு அளிக்கும் உழவனின் பொங்கல்
பொங்குமே எங்கும் இன்பம் தங்குமே !
கிழங்கும் மஞ்சளும் மலைபோல் குவிய
கிழவியும் குழவியும் கரும்பை ருசிக்க
சுற்றம் சேர்ந்து காணும் பொங்கல்
பொங்குமே எங்கும் இன்பம் தங்குமே !
சோரம் போனதில்லை தமிழன் ஒருநாளில்
வீரம் விளைந்த மண்ணடா இதுவென்று
உலகிற்கு சொல்லும் தமிழனின் பொங்கல்
பொங்குமே எங்கும் இன்பம் தங்குமே !
தாய்ப்பால் வழியே தமிழ்பால் குடித்து
தமிழ் உரைக்கும் யாவரும் தமிழினம்
பொங்கலோ பொங்கலென உரக்கச் சொல்லி
வைப்போம் பொங்கல் வளர்ப்போம் ஒற்றுமை !
நன்றி :
முகவை முரசு
ஜனவரி 14 – 20, 2011