வாய்ப்பும்; வியப்பும்

விளம் மா தேமா   என்ற வாய்பாட்டில் அமையும் விருத்தம் 
 
 
 
உறைவிடம் உணவு தந்து
            உடுத்திட உடையும் தந்த
இறைவனை மறந்து நீயும்
            இருத்தலின் வியப்புக் கண்டேன்
மறைவுட னிருந்தே காத்து
           மறைதனில் விளக்கம் காட்டும்;
குறைகளி லிருந்து நீங்கும்;
          குயவனை மறுத்தல் கண்டேன்!!
 
திரைகடல் புயலில் சிக்கித்
         திணறிய பொழுது நாமே
விரைவுடன் விளித்துக் கேட்டால்
        வியந்திடு  மருளால் காப்பான்
கரைதனை அடைந்த நாமே
        கடவுளை மறந்து விட்டால்
வரைமுறை கடந்த தீமை
        வலைதனில் விழுந்த பாவி
 
பொருளினை வழங்கிப் பார்த்தும்;
         பொழுதினி லழித்துப்  பார்த்தும்;
அருளினை அழகாய்த் தந்தும்;
        அழுகிட இறப்பு தந்தும்;
கருவினில் குழந்தை தந்தும்;
       கடலினா லழிவை தந்தும்
ஒருவனாய் இயங்கும் சக்தி
      ஒருமுறை வியந்து போற்று
 
 
         
 ”கவியன்பன்”கலாம், அதிராம்பட்டினம்
எனது வலைப்பூத் தோட்டம் உலா வர வழி:
http://www.kalaamkathir.blogspot.com/