ஐதராபாத் நகரில் ஜூன்-11 அன்று, திருவள்ளுவர் தமிழ்ச்சங்கம் நடத்தும்
9ஆம் ஆண்டு தமிழ் விழா-2016. வாழ்த்து கவிதை.
வான்புகழ் வள்ளுவம் வழியினை ஏற்று
வளமிகு தமிழை வளர்த்திடும் மன்றம் !
தேன்தமிழ் மக்கள் தெலுங்கோடு முசுலீம்
தினந்தோறும் கூடும் தமிழ்த்திருக் குன்றம் !
கூன்பிறை தொழுதோர் கோவிந்தா என்றோர்
கூடியே வாழ்வார் தமிழோடு இன்றும் !
தூண்போல் தாங்கி துவளாமல் காத்து
தொல்தமிழ் இயக்கம் தொடரும் என்றும் !
மும்மொழி பேசும் முத்தொளி நகரில்
முழுமதி பொழிவாய் முத்தமிழ் மணக்கும்
செம்மொழி தமிழின் சிறப்பினைக் கேட்டு
சார்மினா கோட்டை சங்கீதம் படிக்கும் !
நம்மொழி தமிழின் நடையினைப் பார்த்து
நாளும் கவிதை கோல்கொண்டா வடிக்கும்!
எம்மொழி பேசினும் திராவிட நாட்டில்
செம்மொழி தமிழே ஊற்றாய் இருக்கும் !
கொள்கை வழுவா குலத்தமிழ் என்றே
குழந்தை கற்றிட கொடுத்திடு வாழ்வில் !
கல்லும் போதே கலப்படம் இல்லா
கற்கண்டு தமிழை கரைத்திடு நாவில் !
இல்லம் மட்டும் இருப்பதை மாற்றி
எங்கும் தமிழை ஒலித்திடு பாரில் !
வள்ளுவர் தமிழை வளர்ப்போர் தம்மை
வணங்கி தினமும் வாழ்த்திடு பூவில் !
-ப.கண்ணன்சேகர். திமிரி. பேச : 9894976159.
